PARTANGIANGAN PAMUHAI TAON 2025

 

PARTANGIANGAN PAMUHAI

HKBP CIBITUNG RESORT SOLA GRACIA CIBITUNG

DISTRIK XIX BEKASI

Tema Partangiangan: Dijou Gabe Sijala Jolma

Kamis, 06 Februari 2025 Pukul 20.00 WIB

 

01.    Marende BE. HKBP No. 575: 1 Puji ma Debata na Songkal (BL. 575) Bes=Do 4/4

 

1.      Puji ma Debata na songkal, pasangap ma goarNa.

Puji ma, angka rura dohot lung, angka dolok na timbo

Dohot hasak ni galumbang sude mamuji Ho.

Langit i na mansai hembang, bintang i na mansai torang,

Ombun i na mansai saksak pasangaphon Ho, o Debata.

Tung so olo tading au, lao mamuji Ho Tuhan.

Nasa gogo bahenonhu lao pasangaphon Ho.

Ro di ujung ni ngolungku sai pujionhu Ho.

 

(… Jongjong …)

 

02.    VOTUM DOHOT TANGIANG (A. IV/A.6 – D. IV/15)

(Pdt. Liner Mersia br Sihombing, S.Th.)

 

U:      Marhitehite ... Haleluya! (Martangiang ma hita:).

 

H:      Amen.  (… Hundul …)

 

03.    Koor: Ama

 

04.    Marende BE. HKBP No. 172: 1-2 O Jesus Panondang (BL.143) Bes=Do 4/4

 

1.       O Jesus Panondang di portibi on.

Mula ni na torang, tangi hatangkon.

Sai asi rohaMu di pardosa on.

Ho ma mangapuli au na marsak on.

 

2.       Tondi, daging, roha, nang gogona i.

Unang tu na roa, sai di Ho ma i.

Ingkon gok di Ho ma au hinophopMon.

Asa saut martua au siseanMon.

 

05.    MANATAP ORIENTASI PANGHOBASION HKBP 2025: TRANSFORMASI

 

U:    Boti Hata ni Tuhan Jesus na mandok tu hita: “Ndang tarulahon hamu agia aha anggo so mardongan Ahu!” Hamu angka dongan, hobasanta ma di huria i, nang di HKBP Cibitung on di Taon 2025 taon Transformasi. Ndang tarulahon hita ulaon on, anggo so Debata na mandongani dohot na margogoihon hita. Antong Tuhan Debata ma na margogoihon dohot na mangaramoti hita di sude pardalanan ni ngolunta, dohot di sude ulaon panghobasionta.

 

H:   Tu Debata sambing do marhuraja rohangku, sian Ibana ro hatuaonku. Holan Ibana do partanobatoanku dohot hatuaonku.

 

U:    Hata ni Tuhanta Jesus Kristus mandok “Ai dipabinsar do mata ni arina tu angka parroha na jahat nang tu na bonar, diparo do udan tu parroha na tigor nang tu na geduk! Di taon 2025 on, udutanta ma pamasahon ulaon panghobasion taon “Transformasi”. Tarjou do hita sude ruas ni Huria nang angka Parhalado di Huria i, unang gabe sarombang hita dohot portibi on; alai gabe imbaru ma hita, dung muba pingkiranta, asa tau hita manimbangi lomo ni roha ni Debata, i ma na uli, na hinalashonna dohot na sun denggan. Antong, di taon 2025 on, taeahi ma haimbaruon napasadahon di bagasan holong na sian Tuhan i, asa marsangap Debata marhite angka panghobasionta di HKBP Cibitung on.

 

H:   Ale Tuhan! Sai pargogoi ma hami laho Patupahon ulaon i.

 

U:    Huria ni Tuhanta! Marhite huaso ni Debata na manjou dohot na mamillit hita gabe HuriaNa. Nunga tadai jala tapanghilalahon boha rumang ni ngolu na marhaposan tu Debata di bagasan Tuhan Jesus Kristus. Ndang sai torus marpanghilalaan na tabo, alai sipata diloas Debata do hansit panghilalaanta. Ndang sai torus boi dapotan denggan, alai sai pargogoi do hita asa tongtong denggan. Ndang sai pintor songon na di rohanta angka na masa, alai lomo ni rohaNa ma na tongtong saut. O ale Tondi Parbadia, tongtong ondihon hami, tu Ho ma hupasahat hami parsorion ni hami HuriaM, pargogoi ma hami ruasMu on. Amen. (Jongjong ma hamu!)

 

06.     TANGIANG MANGIDO HASESAAN NI DOSA

 

U:      Tatopoti ma dosanta!

          Bodari on, ita ingot ma angka dosanta na ita ulahon. Godang pangalaoisionta. Na mardosa do hita tu Debata, songon ruas ni HKBP na manghaporseai Jesus Kristus Tuhan jala Sipalua. Ndang itaulahon hataNa sian nasa rohanta. Ndang marhabiaran tu Ibana hita. Ingkon parhatopotonta do, jotjot do hita lemba dohot gale, ndang marsitutu sian nasa roha, sian nasa gogo, sian nasa pingkiran.

 

H:     Tuhan asi roham di hami huriaM, sesa dosanami.

 

U:      Disuru Tuhan Jesus do hita asa gabe sira dohot panondang di portibi on. Gabe pangapuli. Gabe parasiroha. Na tau mangurupi. Sipardame. Siparholong. Tutu do nunga ita ulahon i?

 

H:     Tuhan asi roham di hami huriaM, sesa dosanami.

 

U:     Disuru Tuhan Jesus do hita asa laho mamodai saluhut bangso, mandidi nasida tu bagasan Goar ni Ama, Anak dohot Tondi Parbadia! Mangajari nasida mangaradoti nasa hata naung pinatikkonNa. Mardongan bagabaga, sai na dongananNa do hita ganup ari, rasirasa ro ajal ni hasiangan on! Tutu do nunga ita ulahon i?

 

H:      Tuhan asi roham di hami huriaM, sesa dosanami.

 

U:      Ale Tuhan Debata, Pargogo na so hatudosan jala Amanami! Hujou hami do GoarMu na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami! Asi rohaM di hami, sai patongtong ma di hami roha hamauliateon tu Ho.

 

H:     O Tondi Parbadia, pangapul di na marsak roha, pamalum ma saluhut na bernit, binahen ni dosanami!

 

U:      Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami.

 

H:      Urupi, ajari, jala patau ma hami huriaM laho pasauthon taon 2025 Taon Transformasi HKBP asa unang gabe sarombang hami dohot portibi on; alai gabe imbaru ma hami, dung muba pingkirannami, asa tau hami manimbangi lomo ni rohaM, i do na uli, na hinalashonMu dohot na sun denggan!

 

U:      Sai tangihon ma hami, Ho ale Debata, Ama, Anak dohot Tondi Parbadia!

 

S:      Amen! (… Hundul …)

 

07.    Koor: Parompuan

08.    Epistel: Lukas 5: 1-11

 

U:      Tabege ma Hata ni Debata turpuk di partangiangan on sian buku Barita Nauli na Sinurat ni si Lukas 5: 1-11. Jongjong di topi tao Genesaret do Ibana sahali, di na nirongoman ni natorop Ibana, laho umbege hata ni Debata.

 

H:     Jadi tongon ma diida dua parau di topi pasir; ia pardengke i nunga ruar mamburi jalanasida.

 

U:      Gabe dibongoti Ibana ma parau na sada na di si Simon i, jala dipangido tu ibana, asa dipaholang parau i saotik sian pasir i. Hundul do anggo Ibana mamodai natorop i sian parau i.

 

H:     Asa dung mansohot Ibana marjamita, ninna ma mandok si Simon: Lugai ma tu na umbagas jala sampakkon hamu ma jalamuna, asa dapotan.

 

U:      Gabe ninna si Simon ma mangalusi: Guru! Manipat saborngin on do huhalojahon hami, so adong dapot; alai mangasahon hatami olo do ahu sumampakkon.

 

H:     Dipasaut nasida ma i, gabe dapot nasida ma dengke mansai godang, pola maribak jala i.

 

U:      Jala dihilap nasida ma dongannasida na di parau na sada, asa ro mandongani nasida mambuatsa. Ro do nasida, gabe digohi ma parau i duansa maradu lonong.

 

H:     Marnida i si Simon Petrus, marsomba ma ibana tu jolo ni Jesus, huhut ma didok: Laho ma Ho sian ahu, Tuhan, ai halak pardosa do ahu!

 

U:      Ai tarhalomong do ibana ro di sude donganna siala dengke na binuatnasida i.

 

H:     Songon i do nang angka dongan ni si Simon i, si Jakobus dohot si Johannes, angka anak ni si Sebedeus. Jala ninna Jesus ma mandok si Simon: Unang ho mabiar: Olat ni on ma ho gabe sijala jolma!

 

U:      Dipadarat nasida ma angka parau i, ditadingkon ma saluhutna i mangihuthon Ibana. I ma sahatna! Martua do angka na tumangihon Hata ni Debata, jala na umpeopsa.

 

S:      Amen.

 

09.     Koor: Ina Hanna

 

10.     Tangiang Pangondian

 

11.     Koor: Remaja Naposobulung

 

12.     Marende BE. HKBP No. 569: 1 O Jesus Tuhanki (BL.569) C=Do 4/4

 

1.         O Debata, tung longang do rohangku,

Molo hubereng na tinompaM i.

Saluhut bintang, hilap dohot ronggur

Manghatindanghon hasangaponMi.

Marende au Tuhan mamuji Ho, o Debata sangap do Ho.

Marende au Tuhan mamuji Ho, o Debata sangap do Ho.

 

13.     Jamita: Amos 3: 1-8 (Pdt. Nikson Simangunsong)

 

3:1 Tangihon hamu ma hata on, na nidok ni Jahowa taringot tu hamu halak Israel, taringot tu sandok bangso, na hutogihon ruar sian tano Misir, songon on do:

3:2 Holan hamu do nian na hutanda sian nasa bangso di tano on; dibahen i luluhononku ma tu hamu saluhut hajahatonmuna i.

3:3 Tung udur ma tagamon mardalan dua halak, nda jolo sian dos ni rohanasida?

3:4 Tung tagamon ma patungoromon babiat di tombak nda adong soroonna? Tung tagamon pangiaron ni anak ni babiat ma soarana sian liangna, nda adong na jumpangsa?

3:5 Tung tagamon ma tarjail pidong tu jorgong di tano, molo so jolo ditaon sambil? Tung tagamon ma bingkas jorgong i sian tano, nda adong dapotsa?

3:6 Tung tagamon ma mangkuling sarune di bagasan huta, so biahaton situan na torop? Tung adong ma tagamon masa parmaraan di bagasan huta, so binahen ni Jahowa?

3:7 Ai ndang adong dibahen Tuhan Jahowa nanggo sada, nda jolo dipapatar sibunianna tu panurirang, angka naposona i.

3:8 Patungoromon babiat, tung ise ma na so mabiar? Mangkuling Tuhan Jahowa, tung ise ma na so manurirang?

 

14.     Marende BE. HKBP No. 404: 1… Unang Ho Sai di na Holom (BL.268) Es=Do 4/4 (Papungu Pelean I & II)

      

1.     Unang ho sai di na holom, tu na tiur ho antong.

Sulusulu i ma golom, ai holom portibi on.

Naeng ma pasesahononmu dosa tu Tuhan Jesus i.

I pe asa hangoluhononmu na niomohonNa i.

 

2.      Unang ho di hagangguon, sai pasada rohami.

Asa bali haliluon baenon ni sondangNa i.

Sai ungkapi ma rohamu, sai pasiat Tuhanmi.

Pagomgomhon saluhut langkamu tu parholong roha i.

 

15.    MANANGIANGHON BONI: SIMBOL MAMUNGKA NA SA ULAON DI TAON 2025

 

U:   Hamu huria ni Tuhanta dongan sahaporseaon di bagasan Goar ni Tuhan Jesus Kristus! Nuaeng, tangianghononta ma Poti Marende ni huria na imbaru dituhor huria. Marsaringar ma soarana mandongani soara ni huria di pamujionna tu Debata. Dipasupasu ma pande na mamalusa, tongtong gok Tondi ni Debata ganup Organist dohot ganup Pemandu Lagu dohot huria i pasauthon pamujion tu Debata, asa marmulia jala marsangap Debata marhite HKBP Cibitung on.

 

H:   Ale Tuhan! Sai asi ma rohaM oloi ma pangidoannami huriaM!

 

 U:   Nuaeng, sahat ma hita tu manangianghon boni, modal usaha. I ma songon dalanta pasahathon saluhut angka ulaon nang panghobasionta tu Debata di bagasan taon on. Marragam do angka pasupasu na nilehon ni Tuhan Debata tu hita ganup marhite angka ulaonta. Di kantor, sikola, pemerintahan, di pasar, Rumah Sakit, di Pabrik dohot lan na asing. Ala ni i tama do hita mamuji jala pasangaphon GoarNa na badia i asa tongtong boi hita marlas ni roha patupahon ulaon na uli di ngolunta si ganup ari tu tingki na ro.

 

H:   Ale Tuhan! mauliate ma di Ho, ala ni panumpahionMu di saluhut ulaonnami.

 

U:   Hamu huria ni Tuhanta! Songon on do didok par-Psalmen i: “Olophon ma Jahowa, ale sandok tano on! Oloi hamu ma Jahowa marhitehite las ni roha, ro be ma hamu tu joloNa marhite plopolop. Boto hamu ma on: Jahowa do Debata; Ibana jumadihon hita, jala ibana nampuna hita, bahen bangsoNa dohot birubiru pinarmahanNa. Bongoti hamu ma angka bahalNa marhitehite hamuliateon, angka alamanNa marhitehite pujipujian. Tutu, di partingkian saonari on, ndang mangula di hauma be hita songon donganta di Bona Pasogit. Sai tapatupa do partangiangan manangianghon Boni, molo jumpang tingki laho marsuan. Di bona ni taon on, on ma di hita partingkian laho mamungka angka ulaon nang panghobasionta be. On ma tangiangta tu Debata, asa manumpak Debata di angka ulaonta di bagasan haporseaon dohot sihol ni roha, di holong ni Tuhanta laho mamasumasu usaha nang ulaonta na naeng siulahononta taon on di rumah tangganta be, di hutanta nang di huria. Jongjong ma hamu saluhutna! Taendehon ma "Mangula hita jolma”. (BE. HKBP No. 373: 1 BL.219 As=Do 4/4)

      

Mangula hita jolma manabur boni i.

Alai anggo jadina di Debata do i.

Dilehon las ni ari nang nambur udan pe,

Tongtong di panumpakNa marguru sasude.

Nasa uli basa ro sian Debata. I pe Ibana puji ma, huhut haposi da.

 

Sai sian Debatanta do nasa na adong.

Nang rihit sangkamata, nang laut, nang tano on.

Tinompa ni hataNa do hau nang bulung i,

Nang nasa parbuena, nang bungabunga i.

Nasa uli basa ro sian Debata. I pe Ibana puji ma, huhut haposi da.

 

Ibana jumadihon panondang sasude.

Ibana do manjouhon alogo, ombun pe.

Na tau palas rohanta, hipas dagingta i;

ongtong rade bohalta dibaen Tuhanta i.

Nasa uli basa ro sian Debata. I pe Ibana puji ma, huhut haposi da.

 

U:   Na margogo situtu do tangiang ni partigor molo dihaburjuhon. Taingot ma: Sai jumolo ma lului hamu harajaon ni Debata dohot hatigoranNa, dung i tambahononNa do sude angka ondeng tu hamuna (Mat. 6: 33). Hata bagabaga do i sian Tuhanta i. Alani i, tung patujolo ma harajaon ni Debata di nasa angka siulaonta be. Pos ma rohanta, marpanghirimon ma hita di bagasan las ni roha. Amen.

 

16. TANGIANG PELEAN – PASUPASU

 

U:      Balga do asi ni roha ni Tuhanta di hita huriaNa, tung so dipasombu do huriaNa na pinapungupunguNa i. Alai tongtong sai dipargogoi di sude gulmit ni ngoluna, didongani jala dipasupasu. Tangkas ma i hangoluhononta ala ni hataNa naung ita jalo ganup marsadasada.

 

H:     Mauliate ma Tuhan, pargogoi ma hami mangulahon hataM i.

 

U:      Tatangianghon ma peleanta… (Agenda Tangiang Pelean) Amen. Rap mandok ma hita tangiang hatopanta i…

 

H:     Ale amanami na di banua ginjang…

 

U:      Asi ni roha ni Tuhan Jesus Kristus, dohot holong ni roha ni Debata Ama dohot parsaoran ni Tondi Parbadia i ma mandongani hamu!

 

H:     (Mangendehon:) Amen, amen, amen.

 

17.  MASIJALANGAN