ACARA PELETAKAN BATU PARSUHI

 

ACARA PELETAKAN BATU PARSUHI

RENOVASI GEDUNG GEREJA HKBP CIBITUNG

Jumat, 30 Agustus 2024 Pukul 08.00 Wib

(Sude ma ruas niuluhon ni amanta Pdt. Resort marhaliang di inganan na tinontuhon laho patupahon “Peletakan batu Pertama”. Angka utusan sian Parhalado, ruas, undangan, dohot kategorial, jojor ma nasida hombar tu na tinontuhon).

 

1. Pamuhai

 

P:      Hamu saluhut ruas ni huria HKBP Cibitung na ni haholongan di bagasan Kristus Jesus, andorang ta patupa na mameakhon Batu Ojahan Renovasi Pembangunan Gareja ni Tuhan i, saluhutna ma hita mangido asi ni roha ni Tuhan i, asa Ibana na patauhon, dohot na mamasumasu hita saluhut ruas ni huria, laho patulushon ulaon pembangunan ni huria on.

 

J:       Ale Tuhan jongjong do hami nuaeng di inganan on, marsada ni roha mangido: Asi ma rohaM di hami, jala pasupasu ma hami asa tau hami paulihon bagasMu di inganan on.

 

P:      O Debata, parasiroha na sumurung! Tagihon ma pangidoan ruas ni huriaM i, jala tatap ma sada ni roha ni ruasMi, laho pajongjong bagas joroM di inganan on. Borhat ma hami saluhut ruas ni huria on di bagasan panghirimon, haporseaon, dohot holong ni roha manghobasi pembangunan on marhite na mameakkon batu ojahan pembangunan sadarion. Lomo ma rohaM di sada ni roha ni ruas ni huriaM on.

 

J:     Ale Tuhan jongjong do hami nuaeng di inganan on, marsada ni roha mangido: Asi ma rohaM di hami, jala pasupasu ma hami asa tau hami paulihon bagasMu di inganan on.

 

P:     Hujaha ma hata ni Debata di hita hombar tu pangaturhonon ni HKBP di Almanak huria, na tarsurat di buku 5 Musa 9: 6  Ingkon botoonmu tahe, ndada ala ni hatigoranmu sandiri, umbahen dilehon Jahowa, Debatamu tu ho tano na denggan on bahen partalianmu, ai bangso na tangkang do ho marroha. I ma hatana! Martua do angka na tumangihon Hata ni Debata jala na umpeopsa. Amen.

p:    Antong tapuji ma Tuhanta, Ai pardenggabasa do Jahowa, jala rodi saleleng ni lelengna do asi ni rohaNa.

 

 

J:      (mangendehon BE HKBP No. 121 “Jesus Raja ni Huria”)

Jesus, Raja ni huria na porsea, na badia Pasupasu ma au on.

Sai sungguli ma rohangku. Mangihuthon Ho, Rajangku.

Pargogoi ma au tongtong. Pargogoi ma au tongtong.

 

Sai pauli huriaMu, asa lomo ni rohaMu. 

Jumpang Ho di ruasMi 

Angka na serep marroha. Na magigi mida dosa.

Ho ditiru sasude. Ho ditiru sasude.

 

2. Votum/ Doa Permohonan:

 

P:      Marhitehite Goar ni Debata Ama, anakNa Tuhan Jesus Kristus, dohot Tondi Parbadia na tumompa langit dohot tano on. Amen. O Debata Jahowa Amanami, Ho do partanobaton dohot mual ni saluhut hagogoon. Lomo ma rohaM di hami, jala pasupasu ma inganan on, asa batu na hupeakkon hami bahen ojahan pembangunan Gareja di inganan on, togu jala hot, songon batu mamak hajongjongan ni bagasMu. Paias ma inganan on sian angka tondi hajahaton, panggunturi, parsalisian, late ni roha, dohot pangiburuon. Suanhon ma diinganan on hadameon, holong ni roha, dohot parbue ni Tondi, asa sian na mamulai sahat tu na mangujungi pembangunan Gareja di inganan marolopolop jala marlas ni roha ruas ni huriaM i. Pasupasu ma nang angka pande (tukang), na mamandei bagas joro on, lehononMu hahipason, gogo, rukun dohot kerjasama, asa saluhut ulaon nasida denggan jala uli di bagasan dame.

 

J:       Ale Tuhan, tangihon ma tangiang pangidoannami on.

 

P:     Debata Jahowa Amanami, na sun marhabadiaon, di tanganMu do haluaon dohot hangoluan ni huria on. Ho do Parmahan na denggan roha na patongon hami tu jampalan angka na lomak, jala na manogunogu hami tu aek hasonangan. Holan tu Ho do hami marhaporusan jala manghirim. Usehon ma pasupasuM tu saluhut ruas ni huriM i, naung pasahathon silehonlehonna tu ulaon pembangunan Gareja on. Parbue ni haporseaon ma i, asa di bagasan haserepon saluhut ruasMu marsiadu mangulahon angka na denggan.

 

J:       Ale Tuhan, tangihon ma tangiang pangidoannami on. 

P:     Rap ma hita martangiang tangiang hatopanta i. Ale Amanami…

 

P:      Pasupasu.