.jpeg)
.jpeg)
.jpeg)
.jpeg)
.jpeg)
.jpeg)
 |
PARTORDING
NI PARNINGOTAN
TINGKI
PANOMPAON
HUHUT
MINGGU EKOLOGI DI HKBP
(MINGGU XVII DUNG TRINITATIS)
& Ev: Psalmen 104: 1-3+13-24 & Ep: Johannes 3: 13-18
TOPIK MINGGU:
“HABALGAON NI JAHOWA
DI BAGASAN SUDE NA TINOMPANA”
HURIA KRISTEN BATAK PROTESTAN
POS PELAYANAN GRAND CIKARANG CILLAGE (GCV)
SERANG BARU
MINGGU, 22 SEPTEMBER 2024
JOUJOU TU PARMINGGUON:
U: Di
Minggu sadari on, rap dohot sandok huria di portibi on tapatupa do parningotan Tingki
Panompaon ni langit dohot tano on ro di nasa isina. On ma paduahalihon hurianta
HKBP marningot panompaon ni Debata Amanta di langit dohot tano on. Marhite parningotan
on, lam togu ma haporseaonta tu Debata Ama i na manompa langit dohot tano on
dohot nasa isina naung mansai denggan, jala ndang marpansohotan pangaramotionNa
huhut mangalehon denggan basaNa tu nasa na mangolu di portibi on. Dibahen i, tama
situtu do tapasahat pujipujian dohot hamauliateon ni rohanta nang tondinta tu
Debata.
Di sandok HKBP, laos tabahen
do Minggu 22 September 2024 on gabe Minggu Ekologi, laho paingothon hita di
panjouon, ulaon, dohot tanggungjawabta songon halak na porsea laho pauliulihon hasadaon
ni nasa na tinompa. Ndada holan sihataan sambing ianggo ekologi i di Huria HKBP,
alai konteks parngoluonta do ekologi i di na marhuria, marteologi, marhadaulaton
huhut mangolu. Jala ndada holan inganan hangoluanta ianggo portibi on, alai
bagas ni Debata do i, inganan parsombaonta tu Debata, manangihon hataNa, jala manghangoluhon
holong ni rohaNa. Alani i tapuji ma Debata marhite na rap hita marende!
1.
Marende BE. HKBP
No. 569: 1-3 O DEBATA TUNG LONGANG DO
ROHANGKU (BL. 569) Bes=Do 4/4
♫♪♫ O
Debata tung longang do rohangku, molo hubereng na tinompaM i.
Saluhut bintang, hilap dohot
ronggur, manghatindanghon hasangaponMi.
Marende au Tuhan
mamuji Ho, o Debata, sangap do Ho.
Marende au Tuhan mamuji Ho, o
Debata, sangap do Ho.
♫♪♫ Di ladang di adaran dohot tombak, marende pidong tung
mansai sonang.
Punsu ni dolok, sunge dohot rura,
mamaritahon sangapMi Tuhan.
Marende au Tuhan mamuji Ho, o Debata, sangap do Ho.
Marende au Tuhan mamuji Ho, o
Debata, sangap do Ho.
--- Musik --- ---
Jongjong ---
♫♪♫ Molo
huingot balga ni holongMu, marhite Jesus na tarsilang i.
Anak sasadaM i o Debatangku, dilehon Ho
manobus jolma i.
Marende au Tuhan mamuji Ho, o Debata, sangap
do Ho.
Marende au Tuhan mamuji Ho, o Debata, sangap
do Ho.
2. Votum – Introitus
– Tangiang
U: Marhitehite
Goar ni Debata Ama, dohot Goar ni AnakNa Tuhan Jesus Kristus, dohot Goar ni
Tondi Parbadia na tumompa langit dohot tano on. Amen. Pinuji ma Debata Sitompa langit dohot tano on! TanganNa do
na jumadihon nasa na tinompa. Hatiuron dialithon Ibana hira ulos, Ibana
pahembangkon angka langit songon rimberimbe. Ibana manggulanggulangi di angka
aek bilutNa parginjang; huretaNa do dibahen angka ombun i, mardalandalan do
Ibana di atas habong ni alogo. Nunga dipaojak Ibana tano on tu angka ojahanna
i, asa unang lalolalo salelenglelengna. Halomohon Jahowa, jadi lehononNa ma tu ho na pinangido ni roham. Pasahat
ma dalanmu tu Jahowa jala haposi Ibana, asa Ibana paturehon. Haleluya!
H: (Mangendehon:) BE. HKBP No. 852: 1 HALELUYA HKBP (3x) (BL 852) F=Do 4/4 Haleluya, haleluya, haleluya!
U: Martangiang ma hita! Ale Tuhan Debata, Amanami
Parasiroha na sumurung! Mansai denggan do ditompa Ho langit dohot tano dohot
nasa isina, jala ndang hea ditadinghon Ho ulaon ni tanganMu. Pinuji ma GoarMu
saleleng ni lelengna. Ala balga ni holongMu marhite Kristus, AnakMi, nunga
dibahen Ho padan tu saluhut na tinompaM i, jala ndang hea diose Ho padan naung
binahenMi. Gok denggan ni basaM do langit dohot tano on, ale Amang. Mulak rata
do asi ni rohaM jala ndang marpansohotan denggan ni basaM.
Rap
dohot nasa na tinompaM hupuji hami ma Ho ale Debata Ama, Anak dohot
Tondi Parbadia. Rap dohot saluhut angka na porsea di portibi on hupestahon hami
ma tingki panompaonMu di langit, tano dohot nasa isina. Di sandok HKBP sadari
on, hubahen hami ma Minggu Ekologi manang minggu hasadaon ni nasa na tinompa. Pauba
ma andung dohot angguknami gabe pujipujian tu Ho, ale Amang. Pahisar ma tano naung tinompaM i, naung sega ala
haginjangon ni roha dohot hamongkuson ni jolma i, marhite panghophopon ni Jesus
Kristus, AnakMi di hau pinarsilang i. Sai bahen ma hami saluhutna gabe jolma na
tinompa na imbaru marhite Tondi Parbadia. Amen. (Hundul)
3.
Marende BE. HKBP No. 116: 4 DITOMPA HO DO
AU (BL. 243) D=Do 4/4
♫♪♫ Ale Debatangki Sitolusada i, bongoti rohangki parbadiai ma i
Sai Ho ma
lam hutanda, gogongku lam paganda
Manangkup haluaon, maniop hatuaon
Ni Ama,
Anak,Tondi i, na tong pujion i.
4. P a t i k N I D E
B A T A
U:
Tangihon hamu (Tatangihon) ma Patik ni
Debata di Minggu sadari on, i ma na
nienet sian Konfessi HKBP taon 1996
bindu 5, taringot tu Lingkungan Hidup:
Tahaporseai jala tahatindanghon do:
Ditompa Debata do jolma nang inganan
parmianan dohot inganan pangulaonna di portibi on (1 Musa 2: 5-15). Ibana do
nampuna sude, na mangalehon hangoluan tu sude na tinompaNa i. Inganan pangulaon
ni jolma i ma darat, laut dohot hajanghajang (langit, ruang angkasa). Dilehon
Debata do huaso tu jolma i laho paulihon portibi on di bagasan tanggung jawab
na gok. Ulaon ni Jesus Kristus do paluahon jolma i, nasa na
tinompa i songon i portibi on sandiri (Kolose 1:15-20, Rom 8:19-33).
Marhite on: Tahatindanghon do
tanggung jawab ni jolma pangoluhon (melestarikan) sude na tinompa ni Debata asa
boi ibana mangula, hipas dohot marsonang (sejahtera) (Psalmen 8:4-10).
Taalo do angka usaho na manegai lingkungan marhite na
manutungi dohot manabai hau di tombak manang harangan (5 Musa 5: 20, 19-20).
Taalo do angka usaho na mangalitohi aek dohot auangauang (udara), nang aek
panirisan (limbah) na marisi rasun sian angka pabrik marhite so manganturehon
halalao ni aek panirisan i pola tahe menegai aek siinumon, suang songon i taalo
do angka pencemaran udara na manegai parhosaan ni jolma. (paheba Psalm
104: 1-23, Pangungkapon 22: 1-2).
Antong rap mangido gogo ma hita sian Tuhan Debata laho mangulahon na hombar tu PatikNa i.
U+H: Ale Tuhan Debata sai pargogoi ma hami mangulahon na
hombar tu PatikMi. Amen.
5. Marende BE. No. 411: 1+3 NANG PE RARA
DOSAMUNA (BL. 274) A=Do 3/4
♫♪♫ Nang
pe rara dosamu ias dibaen mudarHu.
Nang pe rara dosamu ias dibaen
mudarHu.
Na dapdap songon hasumba songon
itak do.
Nang pe rara dosamu, nang pe rara dosamu,
Ias dibaen mudarHu, ias dibaen mudarHu.
--- Jongjong ---
♫♪♫
SesaonNa dosamu, ndang dibaloshon tu ho
SesaonNa
dosamu, ndang dibaloshon tu ho
Tu Jesus ro ho na loja, di si sabam ho.
SeasaonNa dosamu, sesaonNa dosamu,
Ndang dibaloshon tu ho, ndang dibaloshon tu
ho.
6. Manopoti Dosa
U: Tatopoti ma
dosanta, martangiang ma hita!
Ale Tuhan Debata, Amanami, Sitompa saluhut. Nunga denggan ditompa Ho tano on
nang sude pangisina. Alai husegai hami do i ala haginjangon ni roha dohot hamongkusonnami.
H: Asi ma rohaM di hami ale Tuhan, sai
sesa ma nasa dosanami maradophon angka na tinompaM i.
U: Ale Tuhan Debata, dipillit Ho do hami
laho pauliulihon tano na tinompaMon. Alai hurajumi hami, ndang hibul rohanami
laho mangaradoti hasadaon ni nasa na tinompaM i. Na hurang do parsitutuonnami
maradophon angka na tinompaM na asing. Holan na ringkot tu dirinami sambing do
huparhamaol hami, jala ndang huingot hami na marsigantung
tu hasadaon ni nasa na tinompa i do parngoluonnami di tano on.
H: Asi ma rohaM di hami ale Tuhan, sai
sesa ma nasa dosanami maradophon angka na tinompaM i.
U:
Ale Tuhan
Debata, huparhatopot hami do na jotjot hupasombu hami angka na humaliang hami dohot
bagas joroM i pe ndang ias. Huparhatopot hami do na mansai losok rohanami
manuan huhut pagodanggodanghon hau umbahen na lam mohop jala mahirtang portibi
on.
H: Asi ma rohaM di hami ale Tuhan, sai
sesa ma nasa dosanami maradophon angka na tinompaM i.
U: Ale Tuhan
Debata, disuru Ho do hami marbarita na uli na sian Tuhan Jesus Kristus tu nasa
na tinompa. Alai jotjot huarsahi hami angka na tinompaM i marhite na husegai
hami jala husiaphon hami tombak, laut dohot langit inganan ni nasa na tinompaM i.
H: Asi ma rohaM di hami ale Tuhan, sai
sesa ma nasa dosanami maradophon angka na tinompaM i.
U:
Tabege ma hata bagabaga
taringot tu hasesaan ni dosa! Songon on do Hata ni Tuhan Jahowa: Ro ma hamu tu Ahu, asa
mangolu tondimuna, ninna Tuhan Jahowa. Tung sura rara dosamuna songon abit
bunga dapdap, bontar do bahenonHu songon itak; nang pe rara songon abit
hasumba, gabe songon hapas do muse. Hasangapon ma di Debata na di
ginjang!
U+H: Amen. (Hundul)
7. Marende BE.
No. 783: 1+4 TUHAN SITOMPA
SALUHUT (BL. 783) F=Do 3/4
♫♪♫ Tuhan
sitompa saluhut, Ho do na marmulia i,
Ndang tarasam saluhut nilehonMi.
♫♪♫ Ditongos Ho do AnakMi laho manobus jolma i,
Ndang tarasam asiM i, nilehonMi.
8. MANJAHA HATA NI
DEBATA/E p i s t e l:
U: Tangihon hamu (Tatangihon) ma Hata ni Debata
turpuk Epistel ni ari Minggu on, tarsurat
di barina na uli na sinurat ni si Johannes
3: 13-18 Ndang adong na
manaek tu banua ginjang, ia so naung tuat i sian banua ginjang; i ma Anak ni
jolma i, na di banua ginjang i hian.
H: Jadi songon naung pinatimbo ni si Musa ulok i di
halongonan, songon i naeng patimboon Anak ni jolma i, asa dapotan hangoluan na
salelenglelengna ganup na porsea di Ibana.
U:
Ai songon on do holong ni roha ni Debata di portibi on, pola
do AnakNa na sasada i dilehon, asa unang mago ganup na porsea di Ibana, asa
hangoluan na salelenglelengna di ibana.
H: Ai ndang na disuru Debata AnakNa i tu portibi on, asa
uhumanNa; naeng paluaonNa portibi on tahe, umbahen na disuru.
U:
Ndang siuhuman na porsea di Ibana; alai anggo na so porsea
i, nunga hona uhum, ala so porsea ibana di Goar ni Anak sasada ni Debata.
I do sahatna. Martua do angka na tumangihon Hata ni Debata
jala na umpeopsa.
U+
H: Amen.
9. Marende BE. HKBP
No. 372: 1-7 ROHANGKU SAI
HALASHON MA (BL. 99) Es=Do 4/4
♫♪♫ Rohangku
sai halashon ma sude na sian Debata, luhut denggan basaNa
Sai tatap
hauma i sude, nang porlak dohot tombak pe,
Na uli do rupana, na uli do rupana.
--- Jongjong ---
♫♪♫ Sude na
di balian i do pasangaphon Goar ni Tuhanta Debatanta
Nang eme na
di hauma i, nang hau sude na rata i,
Dipuji do Tuhanta, dipuji do Tuhanta.
10. Manghatindanghon Haporseaon
U: Sadari on rap mamestahon Tingki Panompaon do
hita dohot sude angka na porsea di liat portibi on, jala di sandok HKBP
tapatupa do sadari on Minggu Ekologi. Marhite pesta Tingki Panompaon dohot
Minggu Ekologi on, naeng tarataratai muse haporseaonta paboa na tinompa ni
Debata do langit dohot tano on, na tatanda marhite Jesus Kristus.
H: Marhite pesta on naeng itapaingot muse
dirinta, paboa na so jolma i na gabe
pamusatan ni saluhut na tinompa dohot nasa hangoluan. Ndang tarsirang jolma i
sian tano na tinompa jala
na hinaholongan ni Debata, na tinobus marhite mudar ni AnakNa, jala dipaimbaru
marhite Tondi Parbadia.
U: Marhite pesta Tingki Panompaon dohot Minggu
Ekologi on disosoi do hita laho manghangoluhon haiason, mangorui dohot pasidinghon nasa rompak-rompak, mamarangehon ngolu na denggan maradophon na humaliangta,
mamarhamaol nasa na tinompa, marpangontik
jala jamot tu aek, listrik dohot BBM, jala sigop maradophon angka tanda-tanda
ni hasesega ni na tinompa ni Debata di sandok portibi on, huhut martoruk ni
roha di bagasan hadaulaton, dohot panghatindanghononta angka naung tinobus
marhitehite hamamate dohot haheheon ni Jesus jala marhite TondiNa dibahen hita
gabe anak haholongan ni Debata.
H: Marhite pesta on, rap do hita dohot nasa na
tinompa laho marpanghirimon jala mangula pasauthon portibi on asa tigor, gok
dame, ias jala marudut.
U: Antong,
tahatindanghon ma haporseaonta i, songon na hinatindanghon ni donganta
sahaporseaon di sandok portibi on. Rap ma hita mandok!
U+H: Ahu porsea di Debata Jahowa…. d.u (Hundul)
11.
K O O R:
12. TINGTING:
13. KOOR:
14. Papungu Pelean Huhut Marende BE. HKBP No. 781: 1-4 SAI HALASHON NA TINOMPA
(BL.
781) Bes=Do 4/4 (Pelean Ia & Ib)
♫♪♫ Sai halashon na
tinompa ni Tuhanta Debata
Sunge, laut, dohot tombak ro di
parlangitan i, ro di parlangitan i.
♫♪♫
Marsinondang bulan bintang, nang mata ni ari pe,
Ombun nambur dohot udan, dipatupa Ho
sude, dipatupa Ho sude.
--- Musik ---
♫♪♫ Saluhut na natinompa,
pasangaphon Debata,
Au pe dohot do mamuji, pasangaphon GoarNa i,
pasangaphon GoarNa i.
♫♪♫
Sogot dohot au marnida Ho di hasangaponMi,
Di ingananMi naung monang, na manjalo
tumpal i, na manjalo tumpal i.
--- Musik ---
15. J a m i t a: Psalmen
104: 1-3+13-24
16.
Marende BE. HKBP No. 774: 1-4 TUNG MABAOR SIAN HO (BL. 774) F=Do 4/4 (Pelean
II)
♫♪♫ Tung mabaor sian Ho, mual hangoluan i,
Ai torop
pe batang aek angka dolok dohot rura,
Nang pe
langit dohot tano, Ho do na manompa i,
Ho do na
manompa i, Ho do na manompa i, Ho do manompa i.
♫♪♫ Ai huboto do tangkas hagoonMi Tuhan,
Ho do na
so hatudosan na tongtong Ho pasangapon
Las
rohangku pasangaphon, ro marsomba tu joloM,
Ro
marsomba tu joloM, ro marsomba tu joloM, ro marsomba tu joloM
--- Musik ---
♫♪♫
Tung tarapul rohangki mingot denggan ni basaM i,
Ndang tarasam be argana ndang
marbatas nang godangna,
Disondangi do rohangku, lao
mamereng holongMi,
Lao mamereng holongMi, lao mamereng
holongMi, lao mamereng holongMi.
♫♪♫ Huhilala holongMi na manogu rohangki,
Unang loas au be lilu, manadinghon
Ho Tuhanku,
Pandang i do tujuongku, saleleng di
ngolungki,
Saleleng di ngolungki, saleleng di ngolungki,
saleleng di ngolungki.
--- Musik ---
17. Parsuruon (Jongjong)
U: Mansai holong do roha ni Debata tu portibi on, na
tinompaNa i marhite hataNa. Ndang lomo rohaNa sega jala siap portibi on ala pangalaho
ni jolma manisia. Dilehon do AnakNa na sasada i mate di hau pinarsilang laho padamehon
saluhut dosanta. Jala hehe Ibana sian angka na mate asa dapotan ngolu na imbaru
hita. Ndang marnaloja Ibana paimbaruhon portibi na tinompa jala niasianNa i
marhite TondiNa. Na tarjou do hamu dohot ahu gabe parbarita na uli tu nasa na
tinompa.
H: Di son do hami, ale Tuhan, suru
ma hami!
U: Bahen ma sandok hadaulaton, ulaon dohot
ngolum gabe pasupasu tu portibi on. Parbadiai ma GoarNa marhite holong ni roha
dohot hasatiaonmu tu nasa na tinompa.
H: (Mangendehon) BE. No. 729 LAHO MA HAMU (BL. 729) Es=Do 4/4
♫♪♫ Laho
ma hamu tu liat portibion, ninna
Jesus Kristus Tuhan i
Ninna Jesus Kristus
Tuhan i.
Baritahon ma barita
na uli i, tu saluhut na tinompa i
Tu saluhut na
tinompa i.
Asa marlas ni roha
ma, langit nang dohot hajanghajang i
Marolopolop angka
ladang i, ro di hau na di harangan i.
Asa martopaptopap
sunge i, marhasakhasak tao nang laut i
Marolopolop ma
portibion nang sude na pangisina i. Amen.
18.
Tangiang Pelean – Tangiang Ale Amanami -
Tangiang Pasupasu.
U: Tatangianghon ma peleanta...
H: (Mangendehon) BE. HKBP
No. 204: 2 NDANG TADINGHONONHU HO (BL 73) Bes=Do 2/4
♫♪♫ Nasa na nilehonMi, tondi ro di pamatanghu
Hosa dohot gogongki, ro di
saluhut artangku
Hupasahat i tu Ho,
na so unsatonhu do.
U: Ale Amanami na di banua ginjang! ...
H: (Mangendehon:) BE. HKBP No. 841: 1 AI HO DO NAMPUNA
HARAJAON (BL 841) Es=Do 4/4
♫♪♫
Ai Ho do nampuna harajaon,
dohot hagogoon. Ro di hasangapon, saleleng ni lelengna. Amen.
U: Tangiang Pasupasu
H: (Mangendehon:) BE. No. 845: 1 AMEN, AMEN, AMEN (BL 845) Es=Do 4/4 ♫♪♫ Amen, amen, amen.
.jpeg)
.jpeg)
.jpeg)
0 Komentar