PARTONDING NI PARTANGIANGAN SEKSI AMA SA RESORT

PARTONDING NI PARTANGIANGAN

SEKSI AMA SA RESORT

HKBP RESORT SOLA GRACIA CIBITUNG

DISTRIK XIX BEKASI

Di HKBP Persada Sukajaya

Alamat: Perumahan Gramapuri Persada Cikarang Blok T2 No. 40-42

Jumat, 11 Oktober 2024

I. PANGARADEON

II. PARTANGIANGAN

1. Invocatio

L: Tabe ma di hamu saluhutna ruas Ama di huria i HKBP Resort Sola Gracia Cibitung! Nunga dipapungu asi roha ni Tuhan i hita di Gareja on, patupa Partangiangan Seksi Ama HKBP Resort Sola Gracia Cibitung. Antong ale dongan, ita pasonang ma rohanta masuk ma hita tu Partangiangan on di bagasan las ni roha dohot hamauliateon godang tu Debata.

H: Mauliate ma ale Tuhan Debatanami, na marasiroha tu hami huriaM, na mangalehon partingkian on di hami.

L: Dipangido Debata di na patupa parsaoran dohot Ibana, asa jumolo ita jalo pasupasuNa mangalehon roha na ungkap di hita laho manangihon hataNa. Antong tapuji jala tapasangap ma Ibana marhite na marende hita.

2. Marende BE. HKBP No. 15: 1-2 Aut na Saribu Hali Ganda (BL.103) F=Do 4/4

Aut na saribu hali ganda, saringar ni soarangki.

Naeng nasa gogo bahenonku, mamuji Debatanta i.

Paboa las ni rohangki, hinorhon ni pambaenNa i.

Tung sura sahat soarangku, tu ujung ni portibi on.

Naeng nasa jolma haraonku, mamuji Debata tongtong.

Tama do nasa hosangki, hubaen pasangap Tuhan i.

3. Votum~Introitus~Tangiang (Pdt. Milton H. Ompusunggu, S.Th.)

L: Marhitehite Goar ni Debata Ama!

H: Na manompa jala na manjadihon hita dohot sude nasa na asong di portibi on.

L: Dohot Goar ni AnakNa Tuhan Jesus Kristus!

H: Na mangalehon hangoluan na imbaru di bagasan ngolunta, na manobus hita sian sude dosanta marhitehite mudarNa. Ibana do Tuhanta na ro tu portibi on, asa malua hita sian gomgoman ni sibolis, nang na ro paduahalihon di ari sogot, laho manguhumi sude nasa na marhosa.

L: Dohot Goar ni Tondi Parbadia!

H: Ibana do na padomuhon hita di bagasan parsaoranta sadari on. Ibana do na mangajari hita jala n mangalehon apulapul tu halak na hagogotan dohot hahisaron tun a marsahit. Jala Ibana do Debata na manogunogu dohot mangalehon gogo na imbaru tu na marhaposan tu Ibana.

L: Ibana do na manompa langit dohot tano on! Amen! Sai ingot ma, ale Jahowa, angka denggan ni basaM dohot asi ni rohaM, ai sian narobi do angka i. Asa unang marsuraksurak angka musungku mida ahu. Ale Debatangku, marhaposan tu Ho do ahu, sai unang paila ahu. Haleluya! Martangiang ma hita! Ale Tuhan Debata, Amanami na di banua ginjang, Parasi roha na sumurung! Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida. Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami. Sai sesa ma dosanami saluhut ala ni pelean na sun denggan, na pinelehonNa i humophop hami. Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen.

4. Koor: Pospel HKBP GCV & HKBP Cibitung

5. Marende BE. HKBP No. 712: 1 Togu au ale Jahowa (BL. 712) G=Do 4/4

Togu au ale Jahowa, di dalan na rodop on.

Ho do na tongtong satia, togu au na gale on.

Sagusagu hangoluan, sai pabosur tondingkon,

Sai pabosur tondingkon!

6. Renungan Pangkirimon di Pangaramotion ni Debata

L: Hamu dongan mangolu do hita di partingkian na gok ancaman, mambahen gok biar hita laho mangadopi sude angka na masa i. Alani i dohononta ma:

H: Ale Tuhan, asi ma rohaM, dongani jala ramoti hami huriaM!

L: Ondamondam bencana alam, sipanganon na arga, gok bahan pengawet mambahen gok sahit. Parkarejoan lam maol dapot, Biaya parsikolaan na lam arga.

H: Ale Tuhan, asi ma rohaM, patau hami huriaM manghamonanghon sakuhutna i!

L: Ndada holan i tahe, hatahuton, ganggu dohot biar ni roha, ala pangalaho masa na muramura jolma i mangagohon hosa ni donganna jolma. Ala impolan di arta portibi, impolan di sere, impolan di perak, parhata manggang, parroha haginjangon, angka panginsahi, na so mangoloi natorasna, na so marningot lagu, angka na tois; angka na so marroha holong, pangoseose, panihasnihasi, na so umboto mangorom, parmurukmuruk, na so marholong ni roha di na denggan; angka parjehe, parroha na neang, sipaburnang diri, holongan di hisap ni daging asa di Debata.

H: Ale Tuhan, asi ma rohaM, palua ruas ma ruas ama di huriaM!

…………… hohom ……………

L: Ita ingotma hata ni Tuhan i: “Unang mabiar hamu!”, hombar tu hataNa, ndang pasombuonNa hita huriaNa.

H: Mauliate ma ale Tuhan, di sude denggan basaM dohot panoguonMu.

L: Lam marsadaroha ma ruas ama di huria laho patupahon angka na denggan di tongatonga ni huria dohot tu bangso Indonesia on, lumobi tahe di parngoluon on. Patupahon kepedulian sosial di masyarakat.

H: Mauliate ma ale Tuhan, di sude denggan basaM dohot panoguonMu.

L: Asa lam tarida tumpak na denggan sian ruas ama di huria i di na patuduhon haporseaonna na togu di ngoluna. Marsada roha ma ruas ama laho patupahon ulaon na mambahen las ni roha di tongatonga ni huria i. I do dihalomohon Debata!

H: Mauliate ma ale Tuhan, di sude denggan basaM dohot panoguonMu. Pargogoi jala tongtong pasupasu ma ruas parompuan di huriaM i.

L+H: Amen.

7. Koor: HKBP Setu & HKBP Persada Sukajaya

8. Marende BE HKBP No. 707: 1-2 Hogogoon dohot Apulapul (BL. 707) Es=Do 4/4

Hagogoon dohot apulapul, do dilehon Tuhan i tu au.

Ganup ari au ditogutogu, ganup tingki diondingi au.

Ai hombar tu lomo ni rohaNa, do dilehon Tuhan i tu au.

Ro marsorin arsak las ni roha, haporseaonhu di patau.

Ganup tingki Tuhan raphon ahu, jala sai dipasupasu au.

Sai ditogu au molo madabu, talu musu jala monang au.

Ai pargogo na so hatudosan, Debatangku salelengna i,

Mangalehon dame dohot tua, tu angka na bojok roha i.

9. Hata ni Debata Sijahaon Bodari Hombar tu Almanak Huria

L: Hata ni Tuhanta di hita diparangiangan on, sijahaon manogot di Almanak HKBP sian 2 Timoteus 4: 7-8 ita jaha ma marsorinsorin. Nunga hupasidung paraloan na denggan i, nunga hupaujung parlojongonki; ramot hubahen haporseaon i.

H: Diri nama di jolongku tumpal hatigoran, silehonon ni Tuhan, Paruhum na tigor i, di ari sogot i tu ahu; alai ndada holan tu ahu, tu saluhutna do tahe, angka na mangkaholongi hapataronna i.

L: I ma sahatna. Martua do angka na tumangihon Hata ni Debata, jala na umpeopsa.

L+H: Amen

10. Koor Gabungan

11. Tangiang Pangondian: St. Sudung L. Sidabutar (HKBP Cibitung)

12. Marende BE. HKBP No. 677: 1 Mansai Lambok (BL. 677) G=Do 6/7

Mansai lambok Tuhan Jesus manjou, manjou ho dohot au,

Ida Ibana paima haroromu, mulak ma ho dohot au.

Antong sai ro ma ho, angka na sorat sai ro ma ho.

Mansai lambok Tuhan Jesus manjou, pardosa mulak ma ho.

13. Jamita: 1 Rajaraja 17: 7-16

7. Dung i marhira sataon lelengna, marsik ma sunge i, ala soada ro be udan di tano i.

8. Dung i ro ma hata ni Jahowa tu ibana songon on:

9. Borhat ma ho laho tu Sarpat na mardonokkon Sidon, maringan disi ma ho; ida ma, nunga hudokkon sada parompuan na mabalu disi marmudu ho.

10. Dung i borhat ma ibana laho tu Sarpat; jadi dung sahat ibana tu harbangan ni huta i, ida ma, adong ma disi sada parompuan na mabalu na marsobansoban. Dung i joujou ma si Elia mandok tu nasida: Ua alap di ahu aek i otik di bagasan tabutabu on, asa minum ahu.

11. Alai dung laho nasida naeng mangalap, joujou muse ibana mandok tu nasida songon on: Ua buat di ahu santopik sagusagu di bagasan tanganmu.

12. Alai ninna parompuan i ma: Songon sintongna mangolu Jahowa, Debatam, ndang adong sagusagu di ahu nanggo sada, nda holan itak sampohul di bagasan hudon, angkup ni miak otik di bagasan guriguri, jala ida ma, na marsobansoban do ahu, asa laho ahu paulihon itak i di ahu dohot di anakki, asa mangan hami na dua dung i mate ma.

13. Alai ninna si Elia ma tu nasida: Unang ho mabiar, laho ma ho, bahen ma songon na nidokmu, alai pauli di ahu jumolo sian i sada sagusagu na metmet, jala boan tu ruar di ahu, dung pe i asa pauli di ho dohot di anakmu.

14. Ai songon on do hata ni Jahowa, Debata ni Israel: Ia itak na di bagasan hudon ndang olo suda, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on.

15. Dung i laho ma parompuan i, dibahen ma songon na nidok ni si Elia, gabe mangan nasida, nang ibana nang parompuan i ro di isi ni jabuna ariari.

16. Ia itak na di bagasan hudon ndang olo suda, jala miak na di bagasan guriguri ndang olo marsik, hombar tu hata ni Jahowa, naung pinaboana hian marhite sian si Elia.

HATORANGAN

1. Dung bangkit Si Ahab gabe raja manggomgom Israel, jumahat do ibana maradophon Jahowa martimbanghon angka raja na jumolo sian ibana. Pangalangkup do ibana jala panomba debata baal. Gabe rarat ma pardebata baal di harajaon Israel, lumobi ala si Izebel, pardihuta ni raja i, boru ni raja Etbal sian Sidon. Dipajongjong langgatan pamalean tu ganaganaan baal.

2. Hatiha i ngolungolu siganup ari tongon denggan, gariada lam tu hinsatna ala partalian pinatupa ni Ahab tu harajaon Punisia.

3. Alai anggo situan na torop (rakyat) maol do ngoluna, holan horong saudagar dohot pejabat ni bangso i do na lam maduma. Lam holang ma parngoluon ni pogos tu na mora (kaum elit). Tarlumobi ala torop sian pejabat ni bangso i nunga marsomba tu debata baal.

4. Di partingkian on ma panurirang Elia maminsang raja Ahab. Tung songon ronggur di las ni ari do habaranion ni panurirang Elia pasahat pinsangpinsang ni Jahowa tu raja Ahab. I do na pinajojorna di bindu 17 on.

5. Ala ganda hajahaton ni bangso i, disuru Jahowa si Elia pasahat tona ni Jahowa tu raja Ahab. Paboa na ingkon masa ari logo, ndang ro udan manang nambur tolu satonga taon lelengna.

6. Ndang tarjalo si Ahab hata ni Jahowa i, gabe naeng pamasaonna ma mara tu si Elia.

7. Disuru Debata si Elia martabuni di lambung ni batang aek Karit dibariba ni Jordan. Di si, didok Jahowa tu si Elia “ingkon minum sian sunge i ma ho, jala nunga hudokkon angka pidong sigak, asa nasida marmudu ho disi”. Pos do roha ni si Elia di parsuruon dohot dipanarihonon ni Debata. Sonang do roha ni si Elia dipartabunian i, ai sintong do disuru Debata pidong sigak manaruhon sipanganonna manogot dohot botari.

8. Dung marhira sataon si Elia na martabuni i, marsik ma sunge Karit ala ndang ditongos Debata be udan tu tano i, alani ndang adong be aek siinumon ni si Elia.

9. Ndang mabiar si Elia paingothon Ahab, ala pos rohana di Debata.

10. Sian sunge Kerit disuru Debata si Elia munsat tu huta Sarpat. Andorang so borhat si Elia dipapos Debata rohana. Dipaboa naung adong disi parompuan na mabalu marmudumudu ibana. Ndang manjua si Elia ndang didok: “sipelebegu do jolma di huta i, tagomon ma adong disi holong ni roha dohot parasi ni rohaon. Gari angka na porsea di Debata i ma angka na mora dohot partogi ni bangso i so ungkap rohana manarihon donganna”.

11. Unang ma rohanta holan mangalului na laho tu guriguri dohot tu hudon, tu siubeon mangasahon roharohanta sandiri. Ndada gabe mate rapar hita molo tasagihon santopik sian na adong di hita tu ulaon parasinirohaon manang molo talehon tu angka na mangharingkothon pangurupionta. Sai rade ma hita huria ni Tuhanta marsagi tu na hurangan. Manang ise na manghaporseai Debata pataridahononna ma i marhite haoloon marsagi sipanganonna, tingki, gogo, mangurupi na pogos di bagasan pos ni roha tu Debata. “Na pasali Jahowa do manang ise na mardenggan basa tu na pogos, jala Ibana mamaloshon denggan basana i tu ibana.” (Poda 19:17).

12. Haporseaon na songon i ma diigil Debata, sian ruas Ama tingki on. Tongtong margogo mangulahon parsuruon ni Tuhan i laho manghatindanghon goar ni Kristus. Amen.

DISKUSI

(Tolu Kelompok: 1. Pdt. Milton; 2. Pdt. Dimma; 3. Pdt. Liner)

1. Torop ruas ama, mabiar mangoloi Tuhan i dohot papatarhon haporseaonna ala ndang pos rohana di Tuhan i (?). Boha do bahenonta paturehon na songon on?

2. Sada jaminan do turpuk on di ruas ama, asa mangulahon parsuruon ni Tuhan i, asa unang ganggu, mabiar, manang holsoan taringot tu sipangonon dohot siinumon! Boha do tutu mangulahon i?

3. Tuk do Tuhan i manarihon sude na tinompana. Tarjalo hita do hata on. Jotjot dipatupa Debata halongangan di ngolu ni na porsea. Tadok pogos hita hape tuk do ngolunta mamolus ari tu ari, bulan mamolus bulan, dohot mamulus taon. Tulus parsingkolaan ni anakhonta. Dok ma jolo halongangan sada na hea masa di ho di ngolum!

12. Marende BE. HKBP No. 691: 1... Hupasahat ma tu Jesus (BL. 691) Es=Do 4/4 (Papungu Pelean: Sahalak sian St: Pospel GCV, Persada, Setu, Cibitung).

Hupasahat ma tu Jesus saluhutna ngolungki

Roha nang pambahenanku, saluhutna tingkingki

Ref. Hupasahat ma tu Jesus, saluhutna diringki

Hupasahat ma tu Jesus, saluhutna ngolungki.

Pangkeonku ma tanganku, mangula lomoNa i,

Langka nang simanjojakku, mangihuthon Tuhanki.

Ref. Hupasahat ma …

Nang pamereng ni matangku, mandompakkon Jesus

Soara ni pamanganku, mamuji goarNa i.

Ref. Hupasahat ma …

Dung huida Tuhan Jesus, hutundalhon dosangki,

Lohot rohangki tu Jesus, sipalua tondingki