ACARA MINGGU V DUNG TRINITATIS JUBILEUM 125 TAHUN ZENDING HKBP

PARTORDING NI ACARA MINGGU KELUARGA

MINGGU V DUNG TRINITATIS

(HASITOLUSADAON NI DEBATA)

JUBILEUM 125 TAHUN ZENDING HKBP

& Ev: 2 Korint 3: 2-6 & Ep: Markus 16: 14-18

TOPIK MINGGU:

Hamu do Surat ni Kristus

Kamu adalah Surat Kristus

HKBP RESORT SOLA GRACIA CIBITUNG

Minggu, 30 Juni 2024

1. Joujou Marsomba tu Debata (L= Liturgis; H= Huria; S= Sude)

L: Selamat ari Minggu ma di hamu!

H: Selamat ari Minggu!

L: Na marlas ni roha do sandok ruas ni HKBP sadari on ala sahat hita tu Pesta Puncak Jubileum 125 Taon Zending HKBP. Mamungka 1899-2024 nunga 125 HKBP satia pasauthon parsuruon ni Tuhan Jesus laho marbarita na uli tu liat portibi on. Haunduhon i, gabe tanda do i paboa HKBP i ma huria na jongjong parbue ni Barita na Uli (Zending) na ro di mulana i tu tano Batak.

H: Mauliate ma di Ho ale Tuhan, manongtong do pandonganionMu di huriaM HKBP pasauthon parsuruonMu laho marbarita na uli tu saluhut na tinompaM di liat portibi on.

L: Di parmingguon minggu keluarga tingki on, tarjou do huria i mangarahon saluhut ruas ni huria asa hobas marbarita na uli dalan mangarar utang tu Debata, pataridahon pangoloion di parsuruon ni Debata diulahononta rap pangisi ni bagasta be, sinondangan ni tema 125 Tahun Zending HKBP na mandok: “Hamu do Surat ni Kristus”.

H: Nunga ro hami o Tuhan di adopanMu, Ho o Tuhan mual ni hagogoonami, mual ni panghirimon dohot hangoluannami. Nunga ro hami ruasMon laho marsomba di adopanMu na badia i, nunga rade hami bohalanMu asa lam tu hobasna hami pasauthon parsuruonMi.

L: Puji ma Tuhan i hamu saluhut bangso, patimbul ma Ibana sude hamu pangisi ni portibi on. Endehon ma pujipujianmu paboa haunduhonmu pasauthon lomoNa, paboa ma las ni roham di Debata Parholong i, ai mago ma arsak, dosa nang haporsuhon binahen ni asiNa i, jala las ni roha na manongtong dilehon tu angka na porsea di Ibana. Marende ma hita sian BE HKBP No. 565: 1-3 Las Rohangku Lao Mamuji.

H: Mangendehon BE HKBP No. 565: 1-3 Las Rohangku Lao Mamuji (BL 565) G=Do 4/4

Las rohangku lao mamuji Debata parholong i.

Songon bunga na mangerbang di na binsar ari i.

Arsak, dosa haporsuhon mago dibaen asiM i.

Las ni roha na manongtong lehon di au Tuhanhi.

‚ Sude jadijadianMu, laut, tano, langit i.

Angka bintang dohot bulan nang mata ni ari i.

Hauma ladang nang harangan, rura dohot dolok i.

Saluhutna mangendehon sangap di Tuhanta i.

(--- Musik --- Jongjong---)

ƒ Debata parholong roha na manesa dosangki.

Ndang tarbaen so las rohangku lao mamuji asiM i.

Sai ajari sude hami mangulahon holong i.

Asa gok las rohanami di bagasan Tuhan i.

2. Votum – Introitus – Tangiang

L: Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

H: Amen.

L: Lehetna i di atas ni angka dolok angka pat ni parbarita na uli, na patubegehon hadameon, na mamaritahon Barita na Uli, na patubegehon hatuaon, na mandok tu Sion: “Debatam do bangkit Raja”. Haleluya!

H: (Mangendehon BE HKBP No. 852 Haleluya (3x) (BL 852) F=Do 4/4 Haleluya, haleluya, haleluya!

L: Ale Tuhan Jesus Kristus, Ho do na manobus portibi on marhite mudarMu na badia i. Dijou Ho do torop halak asa pasidohot mamaritahon haluaon na pinatupaM i di hami. Asi ma rohaM, lehon ma hiras ni roha di hami laho marnarita na uli. Sai ajari ma hami manghasurunghon parsuruonMi sian angka ondeng di portibi on. Urupi ma hami, asa sai tongtong rade mangalehon nasa gogonami tu hararat ni harajaonMi. Amen. --- Hudul ---

3. Mangendehon BE HKBP No. 118: 1+4 Paian ma di Hami (BL 6) Es=Do 4/4

Paian ma di hami, o Jesus asiM i.

Asa tung unang hami diansi musu i.

„ Paian ma di hami tongtong panumpakMi.

Gandahon ma di hami asi ni rohaM i.

4. Patik ni Debata: 2 Timoteus 2: 2

L: Tabege ma patik ni Debata di minggu sadari on sian Surat Paduahon na Tinongos ni Apostes Paulus tu si Timoteus 4: 2. Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion. I do sahatna.

L: Antong rap mangido gogo ma hita tu adopan ni Debata laho mangulahon na hombar tu PatikNa i.

S: Ale Tuhan Debata, sai pargogoi ma hami mangulahon na hombar tu PatikMi. Amen.

5. Mangendehon BE HBKP No. 516: 1-2 Bege Joujou ni Jesus i (BL 353) As=Do 4/4

Bege joujou ni Jesus i, tongtong dijou na lilu i.

Mago do birubiru i sian Tuhanta Jesus i.

Sai lului, sai lului birubiru na mago i.

Sai lului, sai lului mulak boan i tu Jesus.

(--- Jongjong ---)

‚ Ho diarahon Jesus i, silu lului na mago i.

Togihon ma tu Jesus i na loja, na maheu i.

Sai lului, sai lului birubiru na mago i.

Sai lului, sai lului mulak boan i tu Jesus.

6. Tangiang Monopoti Dosa–Bagabaga (B.9–C .9)

L: Tatopoti ma dosanta! Ale Tuhan Debata, Pargogo na so hatudosan, Parasiroha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami. Mansai jotjot huarasaki hami Ho marhitehite pingkiran dohot hata dohot pambahenannami na roa i. Ndang huhaholongi hami Ho marhitehite pingkiran dohot hata dohot nasa ateatenami dohot nasa tondinami dohot gogonami; nang dongannami, ndang doshon dirinami hubahen hami. Dibahen i tama do rimasanMu jala uhumanMu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami alani Tuhan Jesus Kristus, Anak haholongan ni rohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on! Amen.

L: Tabege ma hata bagabaga taringot tu hasesaan ni dosa: Satongkin do Hutadinghon ho, alai papungupungonHu ma ho muse marhitehite angka asi ni roha godang! Tagan di parpiar ni murukHu Hutabunihon bohingKu satongkin maradophon ho, alai marhitehite dengganbasa salelenglelengna asianHu ho, nina Jahowa Sipalua ho. Hasangapon ma di Debata na di ginjang!

S: Amen.

7. Mangendehon BE HKBP No. 730: 1-2 Sai Patau ma Au Tuhan (BL 730) Des=Do 6/8

Sai patau ma diringku ale Tuhan

Papatarhon hinauliM i Tuhan

Suru ma TondiM i saor tu rohangki.

Lao papatar holongmu tu rohangki.

‚ Sai patau ma diringku ale Tuhan

Papatarhon hinauliM i Tuhan

Suru ma TondiM i saor tu rohangki

Patariparhon basaM tu donganhi.

8. Epistel: Markus 16: 14-18

L: Tabege ma hata ni Debata turpuk ni ari Minggu on sian Barita na Uli na sinurat ni si Markus 16: 14-18. Itajaha ma marsorinsorin. Dung i muse uju hundul nasida mangan, dipataridahon ma diriNa tu na sampulu sada i, dipinsang ma ganggu dohot jogal ni rohanasida, ala so porsea nasida di angka naung marnida Ibana, naung hehe sian na mate.

H: Jadi ninna ma mandok nasida: ”Laho ma hamu tu liat portibi on; jamitahon hamu ma Barita na Uli i tu nasa na tinompa.

L: Na porsea jala tardidi, dapotan haluaon; alai na so porsea i, hona uhum do.”

H: Jala on ma tanda angka na mangihut tu na porsea: Pabalionnasida do angka sibolis marhitehite goarHu dohot manghatahon hata na imbaru.

L: Jomputonnasida do angka ulok, jala nang diinum rasun hamatean ndang pola mahua nasida; ampehononnasida ma tanganna tu angka na marsahit, gabe malum ma hilalaonna. I do sahatna. Martua do angka na tumangihon hata ni Debata jala na umpeopsa.

S: Amen.

9. Mangendehon BE HKBP No. 658: 1-2 Tu Portibi on na Rundut (BL 658) G=Do 4/4

Tu portibi on na rundut borhat ma ho.

Galak bahen palitomu sai dungo ho.

Boan sondang tu na holom mangurupi na mardangol

I do Barita na Uli ni Kristus i

(--- Jongjong ---)

‚ Taradoti hasadaon ni ruas i.

Talului birubiru na mago i.

Hata ni Tuhan Jahowa do pasada houm nang hata

Sian sude partingkian tu Debata.

10. Renungan Situasional – Manghatindanghon Haporseaon

L: Huria ni Tuhanta, nunga 163 taon HKBP jongjong parbue ni Barita na Uli na binoan ni missionar Eropa di mulana i, jala tarjou do HKBP laho marbarita na uli mamungka taon 1899 sahat tu tingki on nunga 125 Taon. Hataridaan ni haunduhon di parsuruon i, patar marhite parsidohoton ni HKBP di panghobasion tingkat lokal, nasional nang internasional di bagasan semangat na ekumenis yang inklusif. Tarida do i marhite misi ni HKBP, misi ke dalam i ma: manogunogu hapolinon ni haporseaon ni ruas asa marsitutu mangulahon haluaonna jala misi ke luar i ma: ulaon pararathon Barita na Uli tu nasa na tinompa marojahan tu parenta ni Jesus Raja ni Huria i di Markus 6: 15 ”Laho ma hamu tu liat portibi on; jamitahon hamu ma Barita na Uli i tu nasa na tinompa.”

H: Huhatindanghon hami do Tuhan, asi ni rohaM do na patauhon hami gabe ruasMu jala asi ni rohaM do manjou hami asa dohot hami gabe ulaulaM pararathon Barita na Uli i.

L: Na tarjou do saluhut ruas ni huria HKBP asa marsitutu pararathon Barita na Uli marhite ngolu siapari manang didia pe maringan manang aha pe ulaon jala manang sadiharina. Ai didok tema Jubileum 125 Tahun Zending HKBP do ”Hamu do Surat ni Kristus”.

H: Ale Tuhan, togu ma hami saluhut ruasMon asa ngolu na marpanindangion ngolunami manang didia jala manang sadiharina pe, asa marhite ngolunami tarjaha ni manang ise Kristus na hehe i di ngolunami. Gabe rarat ma BaritaM na Uli tu nasa na tinompa.

L: Tahatindanghon ma haporseaonta i songon na hinatindanghon ni donganta sahaporseaon di sandok portibi on. Rap ma hita mandok.

S: Ahu porsea d.u.

11. Koor Mars Jubileum 125 Tahun Zending HKBP

12. Tingting

13. Koor

14. Mangendehon BE HKBP No. 518: 1- Marsinondang Dibaen Jesus (BL 355) As=Do 3/2 (Pelean Ia+Ib)

Marsinondang dibaen Jesus asi ni rohaNa i.

Jala hita do disuru asa tapaboa i.

Tapagalak palitonta, tapatiur dalan i.

Ai torop dope na lilu sai hatop ma mulak i.

‚ Nang au on na dao na jolo di na holom lilu au.

Alai sondang ni Tuhanhu do mamboan mulak au.

Tapagalak palitonta, tapatiur dalan i.

Ai torop dope na lilu sai hatop ma mulak i.

(--- Musik ---)

ƒ Haholomon manghuphupi toropan di tano i.

Tung torop manghalungunhon sondang tu dalanNa i.

Tapagalak palitonta, tapatiur dalan i.

Ai torop dope na lilu sai hatop ma mulak i.

„ Dongan so tung mintop lampu na ringkot tu dongan i.

So tung mago angka jolma dibaen halembaon i.

Tapagalak palitonta, tapatiur dalan i.

Ai torop dope na lilu sai hatop ma mulak i.

15. Jamita: 2 Korint 3: 2-6 Hamu do Surat ni Kristus

2. Hamu do suratnami, naung sinurathon tubagasan rohanami, na tinanda jala jinaha ni saluhut jolma.

3. Ai tanda do hamu surat ni Kristus na hupature hami, sinurat so dohot tinta, marhite sian Tondi ni Debata na mangolu, i do; ndada tu panuratan batu, alai di panuratan daging, i ma ateate.

4. Pos do rohanami taringot tusi tu Debata, marhitehite Kristus.

5. Ndada tau hami sian dirinami, anggo tung mamingkiri agia aha sian dirinami; sandok sian Debata do hatauonnami.

6. Ibana do patauhon hami, gabe parhalado di padan na imbaru, na marhite sian Tondi i; ndada marhite sian surat, ai na mambunu do surat, Tondi i do pangoluhon.

16. Mangendehon BE HKBP No. 666: 1- Ingkon do Boanonta Barita (BL 666) Es=Do 4/4 (Pelean II)

Ingkon do boanonta barita, tu inganan na holom i.

I ma holong nang hasintongan, dame na manongtong i.

Dame na manongtong i.

Ai naung binsar do hatiuron nunga salpu na holom i.

Huaso ni Kristus hot tongtong salelenglelengna i.

‚ Ingkon endehonota pujian, pasangaphon Tuhanta i.

Na tuk manaluhon na jahat nang sinjata porang i,

Nang sinjata porang i.

Ai naung binsar do hatiuron nunga salpu na holom i.

Huaso ni Kristus hot tongtong salelenglelengna i.

(--- Musik ---)

ƒ Ingkon do boanonta barita, Debata do Raja i.

Dilehon Anak sasadaNa manobus pardosa i,

Manobus pardosa i.

Ai naung binsar do hatiuron nunga salpu na holom i.

Huaso ni Kristus hot tongtong salelenglelengna i.

„ Ingkon do hita manghatindanghon Jesus Kristus partobus i.

Asa tu toropna na olo manjangkon na sintong i,

Manjangkon na sintong i.

Ai naung binsar do hatiuron nunga salpu na holom i.

Huaso ni Kristus hot tongtong salelenglelengna i.

17. Parsuruon (Jongjong)

P: Huria hinaholongan ni Kristus! Janghon ma sondang sian Tuhan i na manondangi sandok dalanmu. Mardalan ma ho raphon Tuhan Jesus asa unang lilu ho alai tiur ma angka dalanmu. Jaloonmu ma nang hatuaon dohot dame marhite Tondi Parbadia.

H: Amen. Sai pargogoi ma hami, ale Tuhan!

P: Loas ma digohi holong ni Tuhanta i roham! Asa lam mananda ho di angka pambahenan ni Debata patupahon haluaon tu nasa na tinompa. Sai dipargogoi ma ho marsitutu pararathon barita haluaon i.

H: Amen. Sai pargogoi ma hami, ale Tuhan!

P: Patinggil ma sipareonmu, roha nang pingkiranmu manangihon parsuruonNa di tongatonga ni ulaonmu na marragam i. Sai TondiNa i ma mangalehon hiras ni roha di ho gabe parBarita na Uli.

H: Mangendehon BE HKBP No. 218: 4-5 Tong do Tau Haposan (BL 146) Es=Do 4/4

„ Ale Tuhannami sai sondangi ma, sude dongannami na di Sumat’ra
Dohot halak Nias, halak Borneo, asa tung lam ias lao managam Ho
Dohot halak Nias, halak Borneo, asa tung lam ias Lao managam Ho

… Nang pe angka jolma na di Afrika, ro di halak Sina dohot Asia
O Jesus Panondang sai sondangi ma asa ro marsomba tu Ho, Debata
O Jesus Panondang sai sondangi ma asa ro marsomba tu Ho, Debata.

18. TANGIANG PELEAN

P: Tatangiangkon ma peleanta! Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni huriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

H: Mangendehon BE HKBP No. 204: 2 Ndang Tadinghononhu Ho (BL 73) Bes=Do 2/2

‚ Nasa na nilehonMi, tondi ro di pamatanghu

Hosa dohot gogongki, ro di saluhut artangku

Hupasahat i tu Ho, na so unsatonhu do.

P: Ale Tuhan Jesus Kristus, Tuhannami jala Debatanami! Hamuliaon dohot pujipujian ma di Ho ro di saleleng ni lelengna. Nunga ditaon Ho na porsuk, use mudarMu humophop hami pardosa, asa tu hangoluan hami. Disuru Ho do siseanMu mamaritahon Barita na Uli tu portibi on. Ala ni i do umbahen las rohanami nuaeng, ai nunga sahat tu hami Barita i, gabe jumolo hami jumpangan martimbanghon angka bangso na asing. Sai lehon ma Tondi Parbadia tu hami, asa mangoloi hami di ajar dohot poda na sian HataM i. Sai tambai haporseaonnami jala longkangi rohanami sian portibi on, asa jolma na badia jala na imbaru hami. Diparbaga Ho do oloanMu pangidoannami. Asi ma rohaM dohot di angka na so tumanda Ho dohot halak parugamo na asing angka na hundul di haholomon i. Sai dasdas nasida ro asa dohot nasida marpungu di HuriaM i. Sungguli ma roha ni halak Kristen, suru ma nasida mamaritahon Barita na Uli i, asa tau sira dohot palito nasida di portibi on. Sai ramoti ma HuriaM jala parsahalai angka ParhaladoM laho mamaritahon HataM i dohot patulushon sangkapMu. Sai suru ma angka pangula na burju tu sigotilon na lambas i, asa dipapungu nasida na tau tu harajaonMu. Sai ramoti jala pasupasu ma angka naposoM, na pararathon harajaonMu, di tongatonga ni na so tumanda Ho dohot parugamo na asing, lehon tu nasida gogo, benget ni roha, haporseaon dohot pamompomon ni roha, asa pir tondina manaonnaon, paimahon angka na olo pangoluon. Sai lehon apulapul tu angka pangula naung loja, apusi ma iluilu sian matana, sai marparbue bahen ulaonnasida, asa marolopolop nasida mamuji Ho. Sai ramoti ma angka Huria, naung pinapunguM i, indukna ro di ruasna. Padao sian nasida pangaleleon manang pangarupaon ni parjahat. Sai unang loas tarambat hararat ni Barita na Uli i; sai pademak ma angka musuna. Sai arahon ma halak na di sandok tano on, asa ria nasida ro tu HuriaM, sian utara ro di dangsina, sian habinsaran ro di hasundutan, asa domu hami sada Huria na badia, na marhatopothon: Tuhan Jesus Kristus, i do Raja dohot Tuhan, bahen hasangapon ni Debata Ama saleleng ni lelengna. Amen. Ale Amanami na di banua ginjang! Sai pinarbadia ma goarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

H: Mangendehon BE HKBP No. 841: 1 Ai Ho do Nampuna Harajaon (BL 841) As=Do 4/4

Ai Ho do nampuna harajaon, dohot hagogoon

Ro di hasangapon, saleleng ni lelengna. Amen.

P: Tangiang Pasupasu

H: Mangendehon BE No. 845: 1 Amen, Amen, Amen, (BL 845) Es=Do 4/4

Amen, amen, amen.